စာရေးနေတဲ့လက်တွေ တုန်ယင်လာတာနဲ့အမျှ မျက်ဝန်းအိမ်က ပြည့်လျှံနေတဲ့ မျက်ရည်တွေက စာရွက်ပေါ် တစ်ပေါက်ပြီး…တစ်ပေါက်….။ ရင်ထဲက တင်းကျပ်မှုတွေ ပြေလျော့သွားမယ်ဆိုရင် အံသေသွားပါစေ… ဆက်ပြီး ရေးနေမိဦးမှာ….။ ခုတော့…….။
ရင်ထဲက သံယောဇဉ်အတိမ်အနက်ကို စကားလုံးတွေအဖြစ် ပြောင်းလဲလိုက်တယ်ဆိုရင်တောင် အဲဒီစကားလုံးတွေက ခံစားရသမျှကို ထုတ်ဖော်ပြနိုင်မှာ မဟုတ်ဘူးဆိုတာ သေချာနေတယ်။ စာရွက်ပေါ်က စကားလုံးတစ်လုံးစီမှာ ဖြူစင်တဲ့ သံယောဇဉ်ကြိုးတွေ ရစ်ပတ်နှောင်ဖွဲ့ထားတယ်ဆိုတာကို တစ်နေ့နေ့ သူ ဒီစာကို ဖတ်ချိန်မှာ သိနိုင်ကောင်းပါရဲ့…။ နောက်ဆုံးအနေနဲ့ နှလုံးသားတစ်ခုလုံး ထုပ်ပိုးပြီး ရေးခဲ့တဲ့ စာပေါ်မှာ ကျွန်မရဲ့ သံယောဇဉ်ကြိုးနဲ့ သူ့နာမည်လေးကို မြဲမြံအောင် ချည်နှောင်လိုက်ပါတော့တယ်။
* * *
"လူ" ဆိုတဲ့ နာမ်နဲ့ လောကကြီးမှာ ရှင်သန်နေထိုင်သူတိုင်း ပတ်ဝန်းကျင်ရဲ့ ရိုက်ခတ်မှုတွေ၊ အကောင်းအဆိုးတွေနဲ့ အမြဲ ဒွန်တွဲနေရလေ့ရှိတယ်။ မှတ်တိုင် (၂၇) တိုင် ကျော်ဖြတ်ပြီးချိန်မှာ တချို့မှတ်တိုင်တွေမှာ လူကောင်းတွေနဲ့ တွေ့ခဲ့သလို တချို့မှတ်တိုင်တွေမှာ ဆိုးတဲ့သူတွေလည်း ကြုံခဲ့ရတယ်။ အပေါ်ယံ ဟန်ဆောင်သဘောကောင်းပြီး နောက်ကျောဓားနဲ့ ထိုးတတ်တဲ့ လူတွေနဲ့လည်း တစ်မှတ်တိုင်အောက်တည်း အတူနေခဲ့ဖူးတယ်။ မြွေမြွေချင်း ခြေမြင်တတ်တဲ့သူတွေလည်း ဆုံခဲ့ရသလို သာပေါင်းညာစားတွေနဲ့လည်း လည်ပင်းဖက်ခဲ့ရဖူးတယ်။
မျက်လုံးနှစ်လုံးပွင့်တာနဲ့ ကိုယ်တိုင်လည်း အတ္တမီးတွေရှို့… အတ္တမီးတွေ လောင်မြိုက်နေတဲ့ သကာရည် ချိုမြမြ မျက်နှာပေးတွေနဲ့ ထွေးရောယှက်တင်နေခဲ့ရတော့…. လူ ထဲက လူဖြစ်တဲ့ ကျွန်မဟာ လူတွေကို ကြောက်တတ်လာသလို ယုံကြည်မှုလည်း တဖြည်းဖြည်း နည်းပါးလာခဲ့တယ်။ အရာရာကိုလည်း သံသယနဲ့ ချဉ်းကပ်တတ်သူ ဖြစ်လာခဲ့တယ်။
မောင်နှမသားချင်းထဲ အကြီးဆုံးဖြစ်တဲ့ ကျွန်မ အမျိုးမျိုးသော ဆန္ဒတွေကို အလိုလို မြိုသိပ်ခဲ့ရတယ်။ ငဲ့ညှာခြင်းဆိုတာကို အဘိဓာန်မှာရှာရင်တောင် ဖွင့်ဆိုရှင်းလင်းချက်က ကျွန်မအတွက် ပြည့်စုံလုံလောက်မှာ မဟုတ်။ ရယူခြင်းဆိုတာကို မသုံးစွဲတတ်ခင်ကတည်းက ပေးဆပ်ခြင်းဆိုတာကို မြည်းစမ်းခဲ့ဖူးပြီးပြီ။ ယုံကြည်ရာ ရွက်လွှင့်ချင်တဲ့ မျှော်လင့်ချက် အိပ်မက်တွေကို အရင်ကရော…အခုရော အသာရုပ်သိမ်းလို့ ပုံစံခွက်ငယ်အတွင်းမှာပဲ အသက်ရှူသံတွေ ကြီးရင့်လာခဲ့တယ်။ ဒီလိုပုံစံ ဒီလိုအနေအထားနဲ့ ကျွန်မရဲ့ ဘဝထဲကို ဝင်ရောက်လာသူက "သွန်း"။
* * *
"သွန်း" ဆိုတဲ့ လူငယ်ကလောင်တစ်ချောင်းကို မဂ္ဂဇင်းစာမျက်နှာတွေထက်မှာ ခုနောက်ပိုင်း ခပ်စိပ်စိပ်တွေ့လာရတယ်။ လူငယ်လက်သစ်ကဗျာကနေ မြေစမ်းခရမ်းပျိုးခဲ့တဲ့ "သွန်း" ဟာ နောက်ပိုင်းမှာတော့ ဝတ္ထုတိုကဏ္ဍတွေမှာ အများဆုံး နေရာယူလာခဲ့တယ်။ နာမည်ကလည်း ဆန်းသလို ရေးလက်လည်း ဆန်းတာမို့ ကျွန်မ သတိထားမိနေတဲ့ စာရေးမလေးတစ်ဦးလည်းဖြစ်တယ်။ ကဗျာလည်း အရေးကောင်းသလို ဝတ္ထုတိုမှာလည်း ထက်တဲ့ သူ့လက်ဟာ ဆောင်းပါးရေးတဲ့အခါမှာလည်း ရသပါ တွဲထည့်ရေးလေ့ရှိတယ်။ ပွင့်လင်းရိုးသားပြီး ဟန်ဆောင်မှုကင်းတဲ့ သူ့ဟန်ကို အနုပညာမြောက်တဲ့ စကားလုံးတွေပေါ်ကနေတစ်ဆင့် ကျွန်မ ခံစားရရှိခဲ့တယ်။ ဒီလိုနဲ့ မထင်မှတ်တဲ့တစ်နေ့မှာ သူနဲ့ ခင်မင်ဖို့ အကြောင်းဖန်လာခဲ့ပါတယ်။ အဲဒီအကြောင်းတရားကို ကျွန်မ ကိုယ်တိုင် ဖန်တီးခဲ့တယ်ဆိုရင်လည်း မမှားပါဘူး။
မဂ္ဂဇင်းတစ်အုပ်ရဲ့ စာမျက်နှာထက်က "သွန်း" ရဲ့ ဝတ္ထုတိုတစ်ပုဒ်ဖတ်နေချိန်မှာပဲ စိတ်ထဲမှာ သူ့နဲ့ စကားပြောချင်လာမိတယ်။ သူ့ဝတ္ထုလေးက အကြောင်းအရာရိုးရိုးလေးကို ခပ်ဆန်းဆန်းလေး တင်ပြထားတယ်။ ဒါဟာ သူ့ရဲ့ အတတ်ပညာပဲပေါ့။ ကျွန်မဘက်က မိတ်ဆက် မက်ဆေ့ခ်ျတစ်စောင် ပို့လိုက်ပြီးချိန်မှာ သူ့ဆီက ဖုန်းလက်ခံရတော့ ရင်တွေခုန်လိုက်တာလေ။
"ဟယ်လို… သွန်းပါ… ခု ပြောနေတာ ဘယ်သူပါလဲ"
ရင်းနှီးခင်မင်မှုရှိတဲ့ အသံစာစာလေးအောက်မှာ စကားလုံးတွေ ထစ်အနေခဲ့ပါတယ်။
"ဟုတ်…ဟုတ်ကဲ့… ကျွန်မ နာမည် မိုး ပါ… ဟို… ဆရာမရဲ့ စာဖတ်ပရိသတ်တစ်ယောက်ပါ"
ကြိုးစားပမ်းစားနဲ့ စကားတစ်ခွန်းထွက်သွားချိန်မှာ လူကလည်း တုန်တုန်ယင်ယင်နဲ့။ တစ်ခါမှလည်း ခုလို စကားပြောခွင့်ရမယ်လို့ အိပ်မက်တောင် မမက်ခဲ့ဖူးတဲ့အတွက် ဒါဟာ ကျွန်မ အတွက်တော့ အိပ်မက်တစ်ခုလိုပါပဲ။
"သွန်းကို သွန်း လို့ပဲ ခေါ်ပါနော်" တဲ့…။
နာရီဝက်ကြာ ဖုန်းပြောပြီးချိန်မှာတော့ ကျွန်မနဲ့ သူ့အကြားမှာ မမြင်နိုင်တဲ့ ရင်းနှီးမှုတစ်စွန်းတစ်စ ရရှိခဲ့တယ်။
* * *
အချိန်ခဏအတွင်းမှာပဲ စာရေး၊စာဖတ် ဝါသနာပါတဲ့ ကျွန်မနဲ့ သူ ဟာ မိတ်ဆွေအဆင့်ကနေ အရင်းနှီးဆုံး သူငယ်ချင်းတွေ ဖြစ်လာခဲ့တယ်။ လက်စမ်း ကလောင်သွေးနေတဲ့ ကျွန်မကို သူက အတတ်နိုင်ဆုံး ဘေးကနေ ပံ့ပိုးကူညီတယ်။ (၂၈)ဆိုတဲ့ မှတ်တိုင်သစ်ကို သူနဲ့အတူ ဖြတ်ကျော်ခွင့်ရခဲ့တာ ကျွန်မဘဝအတွက် ထာဝရ အမှတ်ရ နေဖြစ်မယ့် နေ့လေးတစ်ရက်ပါပဲ။ သူက ကျွန်မထက် (၃)နှစ်ကြီးပေမယ့် မျက်ခုံးပါးပါးလျလျလေးအောက်က ထက်မြက်စူးရှတဲ့မျက်ဝန်း၊ နှုတ်ခမ်းပါးလေးတစ်စုံနဲ့ ဆံပင်မရှည်တရှည်လေးက သူ့ကို ပိုပြီး နုငယ်စေတယ်။ ကျွန်မက စိတ်ကြီးသလောက် သူက အေးဆေးညင်သာစွာနဲ့ အရာရာကို သည်းခံပြီး လုပ်ဆောင်တတ်တယ်။
မိသားစုတစ်စုအတွက် ဦးဆောင်မှုပြုနေရတဲ့ ကျွန်မက နည်းနည်းတော့ ယောက်ျားလေးဆန်တယ်။ အဝတ်အစား ဝတ်ဆင်ပုံကအစ ပြောပုံဆိုပုံအဆုံး မိန်းကလေးတစ်ယောက်ရဲ့ စရိုက်အသွင် တစ်စက်မှ မရှိခဲ့ဘူး။ စိတ်မြန်လက်မြန်ရှိသလို ဒေါသလည်းကြီးတတ်တယ်။ စိတ်ရှည်သည်းခံမှုနည်းပါးတဲ့ ကျွန်မက ဆိုင်ကယ်မောင်းရာမှာလည်း ခပ်ကြမ်းကြမ်းမောင်းလေ့ရှိတယ်။ ဒါဟာ ကျွန်မရဲ့ သူနဲ့မတွေ့ခင်အချိန်အထိ ရှိနေခဲ့တဲ့ စရိုက်တွေပေါ့။
"မိုး… ဆိုင်ကယ်မောင်းတာ အရမ်းကြမ်းတာပဲ… နီးမှကပ်ပြီး ဘရိတ်မအုပ်နဲ့လေ… ရှေ့က ဆိုင်ကယ်နဲ့ ကပ်ပြီး မမောင်းပါနဲ့ဆို… နမ်းမိတော့မှာပဲ"
နမ်းမိတော့မှာပဲ…တဲ့။ စာရေးသူပီပီ သူပြောလိုက်တဲ့စကားအသုံးကို သဘောကျလွန်းလို့ ရယ်လိုက်ရတာလေ။ ကျွန်မ သူနဲ့အတူရှိနေချိန်မှာ စိတ်ချမ်းမြေ့ရသလို သူ့ဆီက စကားအသုံးတွေ၊ စာရေးသူတစ်ယောက်ထားရမယ့် စိတ်ထားတွေ၊ စာရေးတဲ့အခါမှာလည်း စာရေးသူက အနေတတ်ရမယ်ဆိုတာတွေ စတဲ့ အရာတွေကို သင်ယူတတ်မြောက်လာခဲ့တယ်။ ဆိုင်ကယ်နောက်က ထိုင်လိုက်တိုင်း ပွစိပွစိပြောတတ်တဲ့သူ့ကို စိတ်မဆိုးတဲ့အပြင် အဲဒီလိုပဲ အမြဲပြောစေချင်ခဲ့မိတယ်။ ကျွန်မရဲ့ဘေးမှာ အစဉ်ရှိနေပေးပြီး ကျွန်မရဲ့ ချို့ယွင်းချက်တွေ၊ အပြစ်တွေ၊ သဘောမကျစရာတွေကို နားလည်မှုအပြည့်နဲ့ ဆုံးမတတ်တဲ့ "သွန်း" ကို ဘယ်တော့မှ မပျက်ပြယ်နိုင်တဲ့ အဖြူရောင်ကြိုးတွေနဲ့ ရစ်ပတ်နေမိပြီဆိုတာ တဖြည်းဖြည်း သိလာခဲ့ပါတယ်။ ဒါပေမဲ့ ကျွန်မ မငြင်းဆန်ခဲ့ဘူး။ အလိုလို ဖြစ်တည်လာတဲ့ ကြိုးတစ်ချောင်းရဲ့ ခေါ်ဆောင်ရာကို ဆန္ဒရှိစွာနဲ့ ညင်ညင်သာသာလေး လိုက်ပါသွားခဲ့မိပါတော့တယ်။
* * *
စိတ်ခံစားမှုကို အလေးပေးပြီး စိတ်ရဲ့စေရာအတိုင်း နေထိုင်တတ်တဲ့ ကျွန်မ… တစ်ခါတလေမှာ သူ့ရဲ့ အပြစ်တင်မှုတွေ ခံရလေ့ရှိတယ်။ သူက ပိုက်ဆံကို စနစ်တကျ ကျစ်ကျစ်လျစ်လျစ် သုံးစွဲတတ်ပေမယ့် ကျွန်မကတော့ သူနဲ့ ဆန့်ကျင်ဘက်။ စိတ်ရှိသလို သုံးတတ်တဲ့ ကျွန်မ အကျင့်ကို သူ မကြိုက်။ တစ်ခါတလေမှာ သူ့အတွက် ရည်ရွယ် ဝယ်ပေးလိုက်တဲ့ ပစ္စည်းတချို့ဟာ အပိုတွေလည်း ဖြစ်နေတတ်တယ်။ သူက စ,သလို နောက်,သလိုနဲ့ ပြောလိုက်တဲ့ စကားအပေါ်မှာ ကျွန်မက အတည်ယူပြီး လုပ်ပေးမိပြန်တော့လည်း အရွဲ့တိုက်မိသလို ဖြစ်တတ်ပြန်တယ်။ တစ်ရက်တုန်းကပေါ့….။
ကျွန်မ အိမ်ပြန်ခါနီး နောက်နေ့ ဘာစားချင်လဲ မေးတော့…
"မုန့်လက်ကောက်စားမယ်… ထန်းလျက်ရည်ရောနော်… နွားနို့လည်း ပါပစေ" လို့ ဖြေတယ်။
တကယ်တော့ သူက နို့နဲ့ လုပ်တဲ့ အစားအစာတွေကို မနှစ်သက်ဘူးဆိုတာ သိတာမို့ နွားနို့မှာတာ နည်းနည်းတော့ ဆန်းနေသလိုပဲလို့ ထင်မိတယ်။ နောက်ရက် မှာတာတွေ သွားပေးမိချိန်မှာ သူ ရှိမနေခဲ့ဘူး။ ခဏအကြာမှာ "ဝယ်လာတဲ့မုန့်တွေကလည်း အများကြီး… နွားနို့မကြိုက်ဘူးဆိုတာ မသိဘူးလား… ဘာလို့ အဲ့လောက် အများကြီးဝယ်လာတာလဲ… ရွဲ့ဝယ်လာသလိုပဲ" ဆိုတဲ့ မက်ဆေ့ခ်ျတစ်စောင်က ကျွန်မရင်ကို သိပ်ကို ဝမ်းနည်းသွားစေခဲ့တယ်။ ချက်ချင်းပဲ မျက်ရည်တွေလည်း ဝေ့ဝဲတက်လာခဲ့တယ်။ သူ ဆုံးမသမျှ နားထောင်ပြီး ကြမ်းတမ်းတဲ့ အကျင့်တွေကို ပြုပြင်လာခဲ့တာ ကျွန်မ သူ့အပေါ် သိပ်တွယ်တာလို့ဆိုတာ သူ တကယ်ပဲ မသိတာလား။ တမင် မသိယောင်ဆောင်နေတာများလား။ တကယ်တော့ ကျွန်မ ဘဝမှာ ကျွန်မကို နားလည်စာနာပေးနိုင်တဲ့ တစ်ဦးတည်းသောသူက "သွန်း" ဆိုတဲ့ အချစ်ဆုံး သူငယ်ချင်းလေးပါ။ ကျွန်မရင်ထဲက သံယောဇဉ်အတိမ်အနက်ကို ဘေးလူတွေ ဘယ်လိုပဲပြောပါစေ… သူတို့မသိဘူးပဲထား… "သွန်း" ကိုတော့ သိနားလည်စေချင်မိတာ ကျွန်မရဲ့ အဖြစ်ချင်ဆုံး ဆန္ဒ တစ်ခုပါ။
* * *
ဆန့်ကျင်ဘက် ကျွန်မတို့နှစ်ယောက်ဟာ အမြဲတမ်း တပူးတွဲတွဲ သွားလာလေ့ရှိတယ်။ ကျွန်မတို့နှစ်ယောက်မှာ ရှားရှားပါးပါး တူတဲ့နှစ်ချက်က စာရေး၊ စာဖတ် ဝါသနာပါတာနဲ့ ဝိုင် ကြိုက်တာရယ်ပေါ့။ နှစ်ယောက်အတူ လည်ပတ်တဲ့ ရက်တွေဆို အပြင်မှာပဲ တစ်ခုခုစားပြီးမှ ပြန်လေ့ရှိတယ်။ သောက်စရာ ဝိုင် ကတော့ တွဲဖတ်ပါတတ်စမြဲ။
မပြင်းမရှ ချိုမြမြ ဝိုင်တွေက စိတ်တွေကို တက်ကြွစေတယ်။ ရင်ထဲခံစားရသမျှကို ပွင့်အန်ထွက်စေတယ်။ ဟန်ဆောင်မှုမရှိ ပြောလိုတဲ့စကားတွေကို အရိုးသားဆုံး ပြောဖြစ်စေတဲ့အတွက် ကျွန်မတို့နှစ်ယောက် ဆုံတွေ့မှုကို သူက "ဝိုင်စက်" တဲ့လေ။ တကယ်လည်း ခင်မင်မှုသက်တမ်း သိပ်မကြာခင်မှာ နှလုံးသားချင်း နီးခဲ့ကြတယ်။ စိတ်တူကိုယ်တူ ပေါင်းခဲ့ကြတယ်။ ပျော်ရွှင်မှုတွေ၊ ဝမ်းနည်းမှုတွေကို ဝေမျှ ခံစားခဲ့ကြတယ်။ ဝိုင်တစ်ခွက်ကြောင့် ကျွန်မတို့ကြားက ကြိုး ခိုင်သထက် ခိုင်လာခဲ့တယ်။ သာမန်အချိန်မှာတော့ "သွန်း" ဟာ အေးဆေးတည်ငြိမ်ပြီး ရင်ထဲရှိသမျှ ဖွင့်ထုတ်မပြောတတ်တဲ့ သူတစ်ယောက်ပေါ့။ ကျွန်မကတော့ စိတ်ကို အလွယ်တကူ လွှင့်ပစ်ပေါက်ကွဲလွယ်သလောက် သူက ထိန်းချုပ်သိမ်းထားနိုင်စွမ်းရှိတယ်ဆိုတာကို တစ်နေ့သောရက်မှာ သိခဲ့ရပြန်တယ်။
တစ်နေ့လုံး ဖုန်းအဆက်အသွယ်လည်းမရ၊ မက်ဆေ့ခ်ျလည်း ပြန်မလာကြောင့် လူက ဂဏာမငြိမ်နိုင်။ စိတ်လည်း အရမ်းပူပြီး ဘာလုပ်လို့ ဘာကိုင်ရမှန်းမသိ။ ခါတိုင်း သူ ဘယ်သွားသွား ပြောလေ့ရှိသလို ခုလိုလည်း တစ်ခါမှ အဆက်အသွယ်မပြတ်ခဲ့ဘူးတော့ ရင်ထဲမှာ ဗလောင်ဆူ လှုပ်ခတ်လို့…။ မတတ်သာတဲ့အဆုံး အိပ်ရာထဲမှာပဲ ဟိုလှိမ့်ဒီလှိမ့်နဲ့ တစ်နေ့တာကို ခက်ခဲစွာ ဖြတ်ကျော်ခဲ့ရတယ်။ ညနေစောင်းချိန်မှာ မင်းကွန်းရောက်နေတယ်ဆိုတဲ့ မက်ဆေ့ခ်ျရတော့မှ သက်ပြင်းချနိုင်တော့တယ်။
သူနဲ့တွေ့တော့လည်း ပြောချင်တဲ့စကားတွေက တစ်ခွန်းမှ ထွက်မလာဘဲ ရင်ထဲမှာ ဆို့ဆို့နစ်နစ်နဲ့။ ကျွန်မ စိတ်တွေ သိပ်ပင်ပန်းနေပြီဆိုရင် လုပ်လေ့လုပ်ထရှိတာက ကျုံးဘေးမှာ ဆိုင်ကယ်ကို အရှိန်နဲ့ ပတ်မောင်းပြီး သီချင်း အော်ဆိုခြင်းပဲ။ အဲလိုချိန်မှာ ကျွန်မ ဘယ်သူ့ကိုမှ ရှက်လေ့မရှိဘူး။ အရေးကြီးတာက ကိုယ်စိတ်သက်သာရာ ရဖို့ပဲ မဟုတ်လား။ ရင်ထဲမှာ တစ်ဆို့ဆို့ကြီးနဲ့ ပြန်လာခဲ့တဲ့ ကျွန်မ "ကျုံးဘေးမှာ ဆိုင်ကယ်ပတ်မောင်းမလို့" ဆိုတဲ့ တစ်ခွန်းပဲ ပြောဖြစ်ခဲ့တယ်။ ဒါပေမဲ့ သက်သာရာမရတဲ့အဆုံးမှာ အလိုလိုပဲ ဖုန်းခွက်ပေါ်က သူ့နံပါတ်ကို နှိပ်မိပြန်တယ်။
"ပြော… မိုး"
"…………………"
"ဟဲလို……."
ကျွန်မဆီက စကားသံထွက်မလာတော့ သူက ထပ်ခေါ်တယ်။
"သွန်း… မိုး ဒီနေ့ ဘာဖြစ်နေတယ်ဆိုတာ သိရဲ့လား"
တစ်ခုခုဖြစ်ရင် ဟန်မဆောင်တတ်တဲ့၊ ဟန်ဆောင်လို့လည်းမရတဲ့ ကျွန်မမျက်နှာကို မြင်ကတည်းက ဂရုတစိုက်နဲ့ မေးသင့်တာပေါ့ ဆိုတဲ့ အတွေးတွေနဲ့ပဲ မကျေမချမ်းအသံနဲ့ ရန်တွေ့မိလိုက်ပါတယ်။ ဒါပေမဲ့ ကျွန်မ ဘယ်လောက်ပဲ စိတ်တွေ လှုပ်ရှားပြီး ပူလောင်နေပါစေ "သွန်း" က အေးအေးဆေးဆေး လေသံလေးနဲ့ပဲ ပြန်ပြောခဲ့တယ်။
သူပြောတဲ့ စကားတွေထဲက "တကယ်ဆို မိုးနဲ့သွန်းကြား ဒါတွေ ဖြေစရာမလိုအောင် Understood ရှိလိမ့်မယ်လို့ ထင်ခဲ့တာ" ဆိုတဲ့ နောက်ဆုံးစကားတစ်ခွန်းနဲ့တင် ကျွန်မ ကြေကွဲဝမ်းနည်းသွားခဲ့ရတယ်။
"သွန်း" အပေါ်မှာ ကျွန်မ နားလည်မှု မရှိခဲ့တာများလား…။ ဟင့်အင်း…။ မဟုတ်ပါဘူး။ ကျွန်မဲ့သူ့ကြားမှာ စိတ်ချင်းနီးသလို နားလည်မှုဆိုတာလည်း အလိုလို ဖြစ်တည်နေခဲ့ပြီးသားလေ။ အဆုံးသတ်စကားတစ်ခွန်းနဲ့တင် သူ့အပေါ်မှာ ကျွန်မ နားလည်မှုရှိတယ်ဆိုတာကို သူ ယုံကြည်ဖို့၊ ရှေ့ဆက် ပိုပြီး နားလည်ပေးနိုင်အောင် ကြိုးစားရတော့မယ်ဆိုတာကို အလိုလို သဘောပေါက်သွားခဲ့ပါတယ်။ မကျေမချမ်းနဲ့ ပို့လိုက်တဲ့ မက်ဆေ့ခ်ျတွေကလည်း သူ့အတွက် အနှောင့်အယှက်ဖြစ်သွားစေတယ်ထင်ပါရဲ့။ အဲဒီဖြစ်ရပ် ဖြစ်ပြီးနောက်မှာ တချို့ကိစ္စတွေမှာ သူ မပြောဘဲ ဘာကိုမှ ထပ်မမေးမိအောင် နေတတ်လာခဲ့တယ်။ ကျွန်မ ဘဝရဲ့ အချစ်ဆုံး သူငယ်ချင်းတစ်ယောက်ကို ဘယ်နည်းနဲ့မျှ အဆုံးရှုံးမခံနိုင်ဘူးလေ။
* * *
သူ့ကျန်းမာရေးအတွက် ကျွန်မ အမြဲစိုးရိမ်တတ်သလို ကျွန်မ တစ်ခုခုဖြစ်ရင်လည်း သူ မနေတတ်ခဲ့ဘူး။ ကျွန်မ စအိုကနေ သွေးကျတုန်းက သူကိုယ်တိုင် ဆေးခန်းလိုက်ပို့ပေးခဲ့တယ်။ လူနာတွေများလို့ "ပြန်တော့… သွန်းမှာ အလုပ်တွေရှိသေးတယ်" လို့ ပြောမိတော့ "သူများအလုပ်ကိစ္စကို ဝင်မပြောနဲ့… မရှည်နဲ့… ရတယ်" ဆိုပြီး သူ့ကို အတင်းနှင်လို့ စိတ်ဆိုးပုံလေးက ချစ်ဖို့ကောင်းလိုက်တာလေ… သူ့မျက်နှာကြည့်ပြီး ရယ်ချင်သွားမိတယ်။
ကျွန်မအပေါ် သူ့ရဲ့ ဂရုစိုက်တတ်မှုလေးတွေက သူ့အပေါ် ပိုပြီးတွယ်တာလာစေခဲ့တယ်။ တစ်ခါတလေ တုပ်ကွေးဖြစ်လို့ နေမကောင်းဖြစ်ရင် ကိုယ်တိုင် ဆိုင်ကယ်မောင်းပြီး ဆေးခန်းသွားရတဲ့ ကျွန်မအတွက် "သွန်း" ရဲ့ ဂရုစိုက်မှုတွေက သိပ်ကိုကြည်နူးစေခဲ့သလို ဘာနဲ့မျှ တန်ဖိုးဖြတ်လို့မရတဲ့ အရာတွေပါ။ ကျွန်မ အဲဒီအရာတွေကို တသက်လုံး ရရှိခံစားသွားချင်တယ်ဆိုရင် သိပ်ကို အတ္တကြီးရာ ရောက်သွားမလား။ ဒါပေမယ့်လည်း အဲဒီ အတ္တတွေဟာ မမြင်နိုင်တဲ့ ကံကြမ္မာတစ်ခုရဲ့အောက်မှာ ကျရှုံးသွားလိမ့်မယ်ဆိုတာ ကြိုတင်သိနိုင်ခဲ့ရင် "သွန်း" နဲ့ပတ်သက်တဲ့ ကျွန်မရဲ့ အတ္တတွေကို စောစီးစွာ ခဝါချခဲ့မိမှာပါပဲ။
* * *
"မိုး… သွန်း အရေးကြီးကိစ္စရှိနေလို့ ဒီရက်အတွင်း အိမ်မလာနဲ့ဦး… စိတ်လည်းရှုပ်နေလို့ မိုးအတွက် အချိန်ပေးနိုင်မှာမဟုတ်ဘူး… ဒီရက်ပိုင်း သွန်းကို နားလည်ပေးပါ"
လွန်ခဲ့တဲ့(၃)ရက် သတိရလို့ ဖုန်းဆက်ချိန်မှာပဲ ကျွန်မကို သူ ပြောခဲ့တာ။ ကိုယ်ယုံကြည်ရင် ဘာကိုမျှ ဂရုမစိုက်ဘဲ လုပ်တတ်တဲ့ "သွန်း" ရဲ့ အကျင့်ကိုသိနေတော့ စိတ်တွေ ပူပန်နေခဲ့မိတယ်။ စိတ်ပင်ပန်းလွန်းပြီး နေထိုင်မကောင်းဖြစ်နေမလားဆိုတဲ့ စိုးရိမ်စိတ်တွေကလည်း နေ့စဉ်နဲ့အမျှပါပဲ။ အဝေးကနေပဲ ပူပန်နေရသူတစ်ယောက်ရဲ့ စိတ်ကို "သွန်း" မြင်ရဲ့လား…။ ကိုယ်ချင်းစာမိရဲ့လား…။ ကျွန်မအတွက်ကတော့ သူ့ဆန္ဒကို လိုက်လျောပေးရုံမှတစ်ပါး အခြားမရှိပြီ။
"သွန်း" ဟာ ကျွန်မအတွက် အဖော်မွန်ကောင်းတစ်ယောက်ပါ။ သူပြောခဲ့ဖူးတဲ့ "သွန်း အတွက် ဘာလို့အဲ့လောက် ခံစားပေးနေရတာလဲ" ဆိုတဲ့ စကားဟာ ရင်ထဲမှာ တံဆိပ်ခတ်ထားသလိုပါပဲ။ ဘဝလက်တွဲဖော်ကိုမှ အဖော်လို့ သတ်မှတ်လို့ရတာမှမဟုတ်တာလေ။ ကျွန်မအတွက်တော့ အဖော်ဆိုတာ ကိုယ့်ကို နားလည်ခံစားပေးနိုင်သူ၊ ဆိုးသည်ဖြစ်စေ၊ ကောင်းသည်ဖြစ်စေ ထောက်ပြပြောဆိုပေးနိုင်သူ၊ အမုန်းခံပြီး စေတနာထားနိုင်သူ၊ ရင်ဘတ်ချင်းနီးသူ.. ဒါတွေနဲ့ပြည့်စုံတဲ့သူဟာ အဖော်ပဲပေါ့။ ကျွန်မနဲ့ "သွန်း" ကြား အဖော်ဆိုတဲ့ အဓိပ္ပါယ်ကို ယူဆပုံချင်း မတူညီကြဘူးဆိုတာ သိလိုက်ရတဲ့ တစ်နေ့မှာတော့….။
Café Brolly ဆိုတဲ့ ဒီ Café ဆိုင်လေးမှာပဲ ကျွန်မနဲ့သူ စတင်ဆုံစည်းခဲ့ကြသလို…
ရှေ့မှာရှိနေတဲ့ ဝိုင်ခွက်တွေကို မမှိတ်မသုန် စိုက်ကြည့်နေကြရင်း…….
"သွန်း… လက်ထပ်တော့မယ် မိုး"
"ဘာ….."
"ခွမ်း…"
ကျွန်မရဲ့ လက်ထဲက သောက်လက်စ ဝိုင်ခွက်က ခြေရင်းမှာ တစ်စစီ ပြန့်ကြဲလျက်…။
"ဟုတ်တယ်…မိုး… မိုးကို သွန်း မပြောပြခဲ့တာ တစ်ခုရှိတယ်… အဲဒါက သွန်းမှာ ချစ်သူရှိတယ် ဆိုတာပဲ… သူက ကိုရီးယားမှာ အလုပ်လုပ်နေတယ်… သူပြန်လာတဲ့အခါ သွန်း တို့လက်ထပ်ဖို့ ရည်ရွယ်ထားတယ်… လကုန်ရင် သူ ပြန်လာတော့မယ်… သူ့မှာ အရှုပ်အရှင်း နည်းနည်းရှိတယ်ကြားလို့ စိတ်ညစ်ခဲ့ရသေးတယ်… ဒါမဲ့ ခု အဲဒါတွေ ပြေလည်သွားပြီ… အဲဒီကိစ္စအတွက် ပြီးခဲ့တဲ့အပတ်က အလုပ်တွေရှုပ်နေခဲ့တာ… မိုး သွန်းရဲ့ မင်္ဂလာပွဲကို ဆက်ဆက်လာပေးပါ"
စကားသံတွေက နားထဲဝင်တစ်ချက် မဝင်တစ်ချက်နဲ့…။ ဘာဆိုဘာမျှ နားမလည်နိုင်တော့…။ ပါးပြင်ပေါ် စီးကျလာတဲ့ မျက်ရည်တွေကို လက်ခုံနဲ့ပွတ်ရင်း…
"သွန်း ရယ်… မိုး.. မိုး… ဘယ်လိုနားလည်ပေးရမှာလဲ သွန်း ကို… ဟင်…. ဒီကိစ္စ သွန်း မိုးကို ဖုံးထားရက်တယ်… ဒါလား အဖော်ဆိုတာ… ပြောစမ်းပါ သွန်း… သွန်း နားလည်တဲ့ အဖော်ရဲ့ အဓိပ္ပါယ်က ဘာလဲ… မိုး အပေါ်မှာရှိတဲ့ သွန်း ရဲ့ သံယောဇဉ်က လျှို့ဝှက်ချက်တွေနဲ့ပါလားကွာ… မိုး သွန်းကို ဘယ်လောက်ထိ တွယ်တာခဲ့လဲဆိုတာ သွန်း မသိဘူးလား… အခု ဒီကိစ္စကို မိုး…မိုး က ရုတ်တရက် ဘယ်လိုလုပ်ပြီး………."
ကျွန်မ စကားသံ ဆက်ထွက်မလာနိုင်တော့…။ ထိတ်လန့်တကြား ရပ်ခဲ့တဲ့ ခြေအစုံ ဒူးညွတ်ခွေအကျ ဘယ်ဘက်ရင်အုံတစ်ခုလုံး အောင့်တက်လာခဲ့တယ်။
"မိုး ရဲ့ သံယောဇဉ် အနှောင်အဖွဲ့တွေက သွန်း အတွက် တစ်ခါတလေ အနှောင့်အယှက်ဖြစ်စေခဲ့တယ် ဆိုတာရော မိုး.. သိရဲ့လား… ပတ်ဝန်းကျင်ကလည်း သွန်း တို့ကို အမျိုးမျိုးပြောကြတယ်… သွန်း လက်ထပ်ပြီးသွားရင်တော့ အားလုံးရှင်းသွားမှာပါ… သွန်းကို မိုး နားလည်ပေးနိုင်ပါစေ"
ကျောခိုင်းသွားတဲ့ "သွန်း" ကို လှမ်းတားဖို့အင်အား ကျွန်မမှာ လုံးဝရှိမနေခဲ့…။ အနိမ့်အမြင့် မမှန်တော့တဲ့ ရင်အုံကို လက်နဲ့ဖိရင်း မျက်ရည်ကြားကနေသာ လှမ်းကြည့်နေခဲ့မိပါတော့တယ်…။
"တကယ်ဆို ကိုယ်တို့က ရင်ဘတ်ချင်းနီးခဲ့ကြတဲ့သူတွေပါ သွန်း ရယ်… တို့နှစ်ယောက်ကြားက အဖြူရောင်ကြိုးကိုမှ အရောင်ဆိုးချင်သူတွေကို အပြစ်မတင်ချင်ပေမယ့် သွန်း ကိုယ်တိုင်ရော ဘာကြောင့်များ နားမလည်နိုင်ခဲ့တာလဲ..။
ကိုယ့်ဘဝရဲ့ ပျော်ရွှင်မှုတွေ မျှဝေခံစားပေးတဲ့သူ၊ နွေးထွေးမှုတွေ ဖြည့်စွက်ပေးတဲ့သူ အဖြစ် သွန်းကို သံယောဇဉ်တွယ်ခဲ့မိတာ မှားလား… ဒီသံယောဇဉ်တွေကို သွန်းကိုယ်တိုင်ရော ကြည်ဖြူခဲ့တယ် မဟုတ်လား… ခုချိန်မှ ဘာကြောင့်များ အရောင်တွေ ဆိုးပြီး အဆိုးတွေ မြင်သွားရတာလဲ…။
ကိုယ်တို့ ရင်ဘတ်ချင်းနီးခဲ့ကြတယ်ဆိုတာကို ခုချိန်မှာ သွန်း ငြင်းချင်ငြင်းလိုက်နိုင်ပါတယ် သွန်း ရယ်"
ဂျွန်မိုး
0 comments:
Post a Comment